སློབ་གསོའི་ཁོར་ཡུག་ཡག་པོ་གཏོད་དགོས།

ད་ལོའི་ཟླ་1ཚེས་9ཉིན་འཚོགས་པའི་རྒྱལ་སྲིད་སྤྱི་ཁྱབ་ཁང་རྒྱུན་ལས་ཚོགས་འདུའི་ཐོག་ཐེམ་ཐོ་བསྒྱུར་མེད་པའི་རྒྱུན་སྡོད་མི་འབོར་གྱི་འཕྲལ་མཁོ་དང་། དཀའ་ངལ། སེམས་ཁྲལ། རེ་སྒུག་བཅས་ཀྱི་གནད་དོན་ཐག་གཅོད་བྱེད་པར་དམིགས་ཏེ། གནས་སྤོས་བུ་ཕྲུག་གི་སློབ་གསོའི་སྲིད་ཇུས་འཐུས་སྒོ་ཚང་དུ་གཏོང་དགོས་ཞེས་ཁ་གསལ་བཏོན་ཡོད་པ་དང་། རྒྱུན་སྡོད་བྱ་ཡུལ་ནས་གཞི་རྩའི་སྤྱི་པའི་ཞབས་ཞུ་མཁོ་འདོན་བྱེད་པ་ཁྱབ་སྤེལ་བཏང་སྟེ། ཐེམ་ཐོའི་གནད་དོན་ཐད་སེམས་ཁྲལ་བྱེད་པའི་མང་ཚོགས་ཀྱི་དཀའ་གནད་བསལ་ནས“དམངས་འཚོ་གཙོ་བོར་འཛིན་པའི”དོན་གཉེར་གསལ་པོར་མངོན་ཡོད།

མིག་སྔར། རང་རྒྱལ་དུ་གཞི་ཁྱོན་ཆེ་ཞིང་སྤུས་ཚད་མཐོ་བའི་སློབ་གསོའི་མ་ལག་བསྐྲུན་ནས“ཁྱིམ་གྱི་སྒོ་རྩར”སློབ་གྲྭ་ཡག་པོ་དེ་བས་མང་བ་བཙུགས་ཡོད་པས། བུ་ཕྲུག་གི་སློབ་གསོའི་ཐད་ཁྱིམ་བདག་བློ་བདེ་རུ་སོང་ཡོད། སློབ་ཞུགས་གོང་གི་ལོ་གཅིག་གི་རིན་མེད་སློབ་གསོ་ལས་བྱིས་པ་ཁྲི་1200ལྷག་ཙམ་ལ་ཕན་པ་ཐོབ་པ་དང་གཞུང་བཙུགས་སློབ་ཆེན་རྩེ་གྲའི་སློབ་ཡོན་གྱིས་ཕྱི་རྒྱལ་གྱི་ལས་རིགས་གཅིག་པའི་བཅུ་ཆ་གཅིག་ནས་ཉི་ཤུ་ཆ་གཅིག་ལས་ཟིན་གྱི་མེད། རང་རྒྱལ་གྱི་སློབ་གྲྭ་འབྲིང་ཆུང་གི་སློབ་གསོའི་སྤུས་ཚད་དེ་གོ་ལ་ཧྲིལ་པོའི་མདུན་གྲལ་དུ་སླེབས་ནས་བྱང་ཚད་མཐོ་བའི་ཤེས་ལྡན་པ་གསོ་སྐྱོང་བྱས་པའི་ཕན་འབྲས་ཚང་མས་གསལ་པོར་མཐོང་གི་ཡོད།

རང་རྒྱལ་གྱིས“ཀུན་ཕན”དང“སྤུས་ལེཌ”དེ་སློབ་གསོ་འཕེལ་རྒྱས་ཀྱི་འགག་གནད་དུ་བརྩི་གི་ཡོད་པས་མི་དཀྱུས་མ་ཞིག་ཡིན་ཡང་མི་ཚེ་བཀྲག་མདངས་འཚེར་བར་བྱེད་པའི་གོ་སྐབས་ཡོད།

“ལོ་ལྔ་ཚན་བཅོ་ལྔ་པའི”འཆར་འགོད་དེ་མི་དམངས་ཀྱི་བློ་ཡིད་ཚིམ་པའི་སློབ་གསོ་ཡག་པོ་གཉེར་རྒྱུར་དམིགས་ནས་བཀོད་སྒྲིག་བྱེད་དགོས་པའི་གྲོས་འགོ་བཏོན་ཡོད། རིན་མེད་སློབ་གསོའི་ཁྱབ་ཁོངས་བརྟན་པོའི་ངང་རྒྱ་བསྐྱེད་དང་རྨང་གཞིའི་སློབ་གསོ་ལེགས་སུ་གཏོང་རྒྱུར་སྐུལ་འདེད་གཏོང་བ་སོགས་སྲིད་ཇུས་དང་བྱེད་ཐབས་རབ་དང་རིམ་པ་དོན་འཁྱོལ་ཡག་པོ་བྱས་ཚེ། སློབ་གསོའི་ཁོར་ཡུག་ཡག་པོ་གཏོད་པའི་དམངས་འཚོའི་ལེའུ་གསར་པ་རྩོམ་ཐུབ་ངེས་རེད་ལ། འཕེལ་རྒྱས་ཀྱི་སྒུལ་ཤུགས་ལ་བརྟེན་ནས་མདུན་སྐྱོད་ཀྱི་སྟོབས་ཤུགས་ལྡབ་འགྱུར་གྱིས་ཆེ་རུ་འགྲོ་ཐུབ་ངེས་རེད། 

རྩོམ་སྒྲིག་པ། པ་སངས་སྒྲོལ་དཀར།