“དེ་བས”གསུམ་མཛུབ་ཁྲིད་དུ་བྱས་ཏེ་ཕྱོགས་ཡོངས་ནས་ཏང་ནན་པོས་སྐྱོང་བར་སྐུལ་འདེད་རྒྱུན་ཆད་མེད་པར་གཏོང་དགོས།

    སྤྱི་ཁྱབ་ཧྲུའུ་ཅི་ཞི་ཅིན་ཕིང་དང་ཏང་ཀྲུང་དབྱང་གིས་ཐབས་ཇུས་བཀོད་སྒྲིག་གང་དུ་གནང་ཚེ། ཆབ་སྲིད་ཀྱི་ལྟ་སྐུལ་ཡང་དེ་དང་ལྷན་དུ་རྗེས་སྙེག་ཐུབ་པ་མཐའ་འཁྱོངས་བྱེད་པ་དང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་དང་། མཛུབ་སྟོན་དང་མཆན་བཀོད་མཛུབ་སྟོན་གལ་ཆེན་གྱི་དགོངས་དོན། ཏང་ཀྲུང་དབྱང་གི་ཐབས་ཇུས་བཀོད་སྒྲིག་གལ་ཆེན་བཅས་ལ་དམ་པོར་དམིགས་ནས། མངོན་གསལ་དོད་པའི་གནད་དོན་དུས་ཐོག་ཏུ་ཤེས་རྟོགས་གནད་སྨིན་ཐུབ་པར་བྱེད་པ་དང་། བཅོས་སྒྲིག་དང་དག་ཐེར་གཏིང་ཟབ་བྱེད་པར་སྐུལ་འདེད་གང་ལེགས་གཏོང་བ་བཅས་བྱས་ཏེ། ཏང་ཀྲུང་དབྱང་གི་ཐབས་ཇུས་བཀོད་སྒྲིག་གལ་ཆེན་དང་རང་སྐྱོང་ལྗོངས་ཏང་ཨུད་ཀྱི་ལས་ཀའི་བཀོད་སྒྲིག་ཕྱོགས་ཡོངས་དང་། གནད་འཁེལ། སྤུས་ཚད་མཐོ་པོ་བཅས་ཀྱི་སྒོ་ནས་དོན་འཁྱོལ་ཡོང་བར་འགན་ལེན་བྱེད་དགོས།

“དབང་ཆ་དེ་ཉིད་ལམ་ལུགས་ཀྱི་རླུང་ཙིའི་ནང་དེ་བས་ཚན་རིག་དང་མཐུན་ལ་ནུས་ལྡན་ངང་འཇུག་པ”ནི་ཟམ་མི་ཆད་པར་འཐུས་སྒོ་ཚང་དུ་འགྲོ་བའི་ལམ་ལུགས་དང་ཚད་གཞིའི་མ་ལག་ལ་བརྟེན་ཏེ་ཕྱོགས་ཡོངས་ནས་ཏང་ནན་པོས་སྐྱོང་བར་བརྟན་བགྲོད་རྒྱང་འཁྱོལ་ཡོང་བ་བྱེད་དགོས། ཏང་ནང་ཁུལ་གྱི་ཁྲིམས་སྲོལ་དང་ལམ་ལུགས་འཛུགས་སྐྱོང་ལ་ཤུགས་སྣོན་རྒྱག་པ་ནི་ཕྱོགས་ཡོངས་ནས་ཏང་ནན་པོས་སྐྱོང་བའི་ཕུགས་ཀྱི་ཐབས་ཇུས་དང་རྩ་བའི་ཐབས་ཇུས་ཡིན་པ་ངོས་འཛིན་གཏིང་ཟབ་བྱས་ཏེ། ལམ་ལུགས་འཛུགས་སྐྱོང་ལ་བརྟེན་ནས་བསམ་བློ་འཛུགས་སྐྱོང་དང་། རྩ་འཛུགས་འཛུགས་སྐྱོང་། སྤྱོད་ཚུལ་འཛུགས་སྐྱོང་། རུལ་རྒོལ་གཙང་སྤེལ་འཛུགས་སྐྱོང་བཅས་བརྟན་དུ་བཏང་སྟེ། ཕྱོགས་ཡོངས་ནས་ཏང་ནན་པོས་སྐྱོང་བ་དེ་ཁྲིམས་སྲོལ་དང་ལམ་ལུགས་ཀྱི་འཁོར་ལམ་ཐོག་འཕེལ་རྒྱས་གཏིང་ཟབ་ཡོང་བར་སྐུལ་འདེད་གཏོང་དགོས། ལམ་ལུགས་དང་གཏན་འབེབས་སྔར་བས་འཐུས་སྒོ་ཚང་དུ་བཏང་སྟེ་སྲིད་ཇུས་གལ་ཆེན་གཏན་འབེབས་དང་། ལས་གྲྭ་གལ་ཆེན་ཞིབ་བཤེར་མཆན་འགོད། མ་དངུལ་འབོར་ཆེན་བེད་སྤྱོད། ལས་བྱེད་པ་འདེམས་བསྐོ་བཀོལ་སྤྱོད་སོགས་དོན་གནད་གལ་ཆེན་ལ་དམ་པོར་དམིགས་ཏེ་དབང་ཆ་སྤྲོད་པ་དང་། དབང་ཆ་སྤྱོད་པ། དབང་ཆར་ཚོད་འཛིན་བཅས་ཕན་ཚུན་གཅིག་གྱུར་དང་ཁ་གསལ་ལ་ཁུངས་གཏུགས་ཆོག་པའི་ལམ་ལུགས་ལམ་སྲོལ་འཐུས་སྒོ་ཚང་དུ་གཏོང་དགོས། ལམ་ལུགས་ལག་བསྟར་བྱེད་ཤུགས་ཆེ་རུ་ཧུར་ཐག་གཏོང་དགོས་པ་དང་ལྷག་པར་དུ“འགག་རྩའི་ཉུང་ཤས”ཡིན་པའི་རིམ་ཁག་འགོ་ཁྲིད་ལས་བྱེད་པས་རང་དཔེ་གཞན་སྟོན་དང་སྣེ་ཁྲིད་ནས་ལམ་ལུགས་ལག་བསྟར་བྱས་ཏེ་དྲང་གཞག་ངང་དབང་ཆ་སྤྱོད་པ་དང་། ཁྲིམས་ལྟར་དབང་ཆ་སྤྱོད་པ། དམངས་ཆེད་དབང་ཆ་སྤྱོད་པ། སྤྱོད་གཙང་ངང་དབང་ཆ་སྤྱོད་པ་བཅས་བྱས་ཏེ། ལམ་ལུགས་བརྩི་སྲུང་ཞུ་མཁན་གྱི་སྣེ་ཁྲིད་པ་དང་ལམ་ལུགས་ལག་བསྟར་བྱེད་མཁན་གྱི“ཉེ་རིང་ཕྱོགས་ལྷུང་མེད་པའི་མི”ཡག་པོ་ཞིག་བྱེད་དགོས།

“རུལ་སུངས་ལ་ངོ་རྒོལ་བྱེད་པའི་འཐབ་རྩོད་ལ་དེ་བས་རིག་པ་དྭངས་གསལ་དང་བློ་བརྟན་འགྱུར་མེད་ངང་སྐུལ་འདེད་གཏོང་བ”ནི“དམིགས་བསལ་རང་བཞིན་མེད་པའི”རང་རྟོགས་ལ་བརྟེན་ནས་རང་ངོས་གསར་བརྗེ་མཐར་ཕྱིན་པ་བྱེད་དགོས། དམིགས་བསལ་རང་བཞིན་མེད་པའི་བསམ་བློའི་ཐོག་ནས་དར་ཆ་གསལ་སྟོན་གྱིས་རུལ་སུངས་ལ་ངོ་རྒོལ་བྱེད་པ་དང་བློ་བརྟན་འགྱུར་མེད་ངང་རུལ་སུངས་ལ་ཆད་གཅོད་བྱེད་པ་ནི་རང་སྐྱོང་ལྗོངས་ཏང་ཨུད་ཀྱི་སྔ་ཕྱི་བར་གསུམ་གྱི་ལངས་ཕྱོགས་ཤིག་རེད།

བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས་དུས་བབ་ལ་བརྡར་ཤ་ཡང་དག་བཅད་པ་དང་ཚན་རིག་དང་མཐུན་པའི་ངང་ལས་འགན་བཀོད་སྒྲིག་གནང་བར་གོ་བ་གཏིང་ཟབ་ལེན་པ་དང་། རུལ་སུངས་ལ་ངོ་རྒོལ་བྱེད་པར་དམིགས་བསལ་རང་བཞིན་མེད་པའི་བསམ་བློ་བརྟན་པོ་འཛུགས་པ། དམ་ནན་གྱི་རྩ་བའི་དགོངས་གཞི་དང་། དམ་ནན་གྱི་བྱེད་ཐབས། དམ་ནན་གྱི་རྣམ་པ་བཅས་ལ་གཡོ་འགུལ་མི་གཏོང་བ་མཐའ་འཁྱོངས། དེ་བས་ནུས་ལྡན་དང་ཕན་ནུས་ལྡན་པའི་བསམ་ཕྱོགས་དང་བྱེད་ཐབས་ལ་བརྟེན་ནས་རུལ་སུངས་ལ་ཆད་གཅོད་དང་ལྐོག་ཟ་གཙང་སེལ། བློ་བརྟན་འགྱུར་མེད་ངང་རུལ་སྲུངས་ལ་ངོ་རྒོལ་གྱི་འཐབ་རྩོད་གཏིང་ཟབ་ཕྱོགས་སུ་སྐུལ་འདེད། ས་མཐོའི་མི་རིགས་ཁག་གི་མི་དམངས་ཚོས་རུལ་སུངས་ལ་ཞིབ་བཤེར་བྱེད་མཁན་ཡོད་པ་དང་། ཁེ་ཕན་ལ་སྲུང་སྐྱོབ་བྱེད་མཁན་ཡོད་པ། གནད་དོན་ལ་དོ་དམ་བྱེད་མཁན་ཡོད་པ་བཅས་ཡག་པོ་ཚོར་བ་བྱེད་པ། ཏང་གིས་བོད་དུ་སྲིད་སྐྱོང་བའི་རྨང་གཞི་ཟམ་མི་ཆད་པར་བརྟན་དུ་གཏོང་བ་བཅས་བྱས་ཏེ་བོད་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་སྟོབས་ཤུགས་ཆེན་པོ་དང་སྒུལ་ཤུགས་ཆེན་པོ་གཅིག་ཏུ་སྒྲིལ་ཐུབ་པ་བྱེད་དགོས།

“ལོ་ལྔ་ཚན་བཅོ་ལྔ་པའི”འགོ་འཛུགས་ས་གསར་པའི་ཐོག་ལྗོངས་ཡོངས་ཀྱི་གོང་འོག་ཚང་མའི་ཏང་ཡོན་ལས་བྱེད་པ་མི་རེ་ངོ་རེས་རང་རྟོགས་ངང“དེ་བས”གསུམ་གྱི་བླང་བྱ་གལ་ཆེན་ཚད་གཞིར་བཟུང་སྟེ། ལྗོངས་ཏང་ཨུད་ཀྱི་ལས་ཀའི་བཀོད་སྒྲིག་གཞིར་བཟུང་མཚམས་མེད་རྒྱུན་སྒྲུབ་ཀྱི་བློ་རྩ་བརྟན་པོ་དང་སྙིང་རུས་ལ་བརྟེན་ནས་འཐབ་རྩོད་ཀྱི་སྙིང་སྟོབས་དར་སྤེལ་དང་འཐབ་རྩོད་ཀྱི་འཇོན་ཐང་ཆེ་རུ་བཏང་སྟེ། ཕྱོགས་ཡོངས་ནས་ཏང་ནན་པོས་སྐྱོང་བའི་བླང་བྱ་ཆད་ལུས་མེད་པར་དོན་ཐོག་ཏུ་འཁྱོལ་བ་དང་ཏང་ལ་དོ་དམ་དང་ཏང་བཅོས་སྐྱོང་གི་གྲུབ་འབྲས་གསར་པར་བརྟེན་ནས་ཀྲུང་གོའི་ལུགས་ཀྱི་དེང་རབས་ཅན་གྱི་གངས་ལྗོངས་ཀྱི་ལེའུ་གསར་པ་རྩོམ་དགོས།

  རྩོམ་སྒྲིག་པ། ཟླ་སྒྲོན།