མི་རིགས་མཐུན་སྒྲིལ་གྱི་མེ་ཏོག་ནམ་ཡང་གངས་ལྗོངས་ས་མཐོར་བཞད་པར་བྱེད་དགོས།

ཟླ་9པ་ནི་ལོ་ལེགས་ཀྱི་དུས་ཚིགས་ཤིག་རེད་ལ། མི་རིགས་མཐུན་སྒྲིལ་ཡར་ཐོན་གྱི་ཟླ་བ་ཞིག་ཀྱང་རེད། མི་རིགས་མང་པོ་འདུས་སྡོད་བྱེད་པའི་ས་ཁུལ་ཞིག་ཡིན་པའི་ངོས་ནས། ལོ་70ལྷག་ཙམ་རིང་། ཏང་གི་མི་རིགས་སྲིད་ཇུས་ཀྱི་འོད་ཟེར་འོག་བོད་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་མི་རིགས་མཐུན་སྒྲིལ་ལས་དོན་གྱི་ཀ་བཞི་གདུང་བརྒྱད་ཟམ་མི་ཆད་པར་བསྐྲུན་ཏེ། མི་རིགས་ཁག་འཆམ་མཐུན་མཉམ་གནས་དང་། ཕྱར་བ་གྲུ་འདེགས། འཆམ་མཐུན་འཕེལ་རྒྱས་བཅས་ཀྱི་རྣམ་པ་བཟང་པོ་ཐོག་མཐའ་བར་གསུམ་དུ་རྒྱུན་འཁྱོངས་བྱེད་བཞིན་ཡོད་པས། འདྲ་མཉམ་དང་། མཐུན་སྒྲིལ། རོགས་རེས། འཆམ་མཐུན་བཅས་ཀྱི་མི་རིགས་འབྲེལ་བ་ཉིན་རེ་བཞིན་སྲ་བརྟན་དུ་འགྲོ་བཞིན་ཡོད།

མི་རིགས་མཐུན་སྒྲིལ་ནི་མི་རིགས་ཁག་གི་མི་དམངས་ཀྱི་སྲོག་རྩ་ལྟ་བུ་དང་བོད་ཀྱི་འཕེལ་རྒྱས་མྱུར་པོ་དང་ཡུན་རིང་བདེ་འཁོད་ཀྱི་རྨང་རྡོ་ལྟ་བུ་ཡིན། བོད་དུ་བོད་རིགས་དང་། རྒྱ་རིགས། ཧུའེ་རིགས། ལྷོ་པ། མོན་པ་སོགས་མི་རིགས་45ཡོད་ཅིང་། མི་རིགས་ཁག་བདེ་སྐྱིད་འཆམ་མཐུན་དང་། ཁྱིམ་ཚང་གཅིག་ལྟར་མཉམ་དུ་འཚོ་བ་སྐྱེལ་བཞིན་ཡོད། དེ་ནི་བོད་ཀྱི་མི་རིགས་ཁག་མཉམ་དུ་འཚོ་སྡོད་དང་། མཉམ་དུ་སློབ་སྦྱོང་། མཉམ་དུ་བྱ་བ་སྒྲུབ་པ། མཉམ་དུ་སྤྲོ་བར་རོལ་བ་བཅས་ཀྱི་རྣམ་པའི་གསོན་ཉམས་ལྡན་པའི་བསྡུས་རིས་ཤིག་རེད། མི་རིགས་ཁག་གི་བུ་ཕྲུག་ཚོས་ཐུན་མོང་ཐོག་བོད་ལྗོངས་གསར་སྤེལ་དང་འཛུགས་སྐྲུན། ཐུན་མོང་ཐོག་མཐའ་མཚམས་བརྟན་ལྷིང་དང་། རྒྱལ་ཁབ་གཅིག་གྱུར། མི་རིགས་མཐུན་སྒྲིལ་བཅས་ལ་སྲུང་སྐྱོང་བྱས་ནས་མེས་རྒྱལ་དར་རྒྱས་གོང་འཕེལ་གྱི་གྲུབ་འབྲས་མཉམ་སྤྱོད་བྱེད་དགོས།

ད་ཆ“ཁ་བྲལ་ཐབས་མེད་པ་གསུམ”གྱི་བསམ་བློ་མི་སེམས་སུ་གཏིང་ཟབ་ཟུག་པ་དང་“ངོས་འཛིན་ལྔ”སྔར་བས་མཐོ་རུ་འགྲོ་བཞིན་ཡོད། ལག་ལེན་ལས་ར་སྤྲོད་བྱས་པར། མི་རིགས་མཐུན་སྒྲིལ་གྱི་རྩ་བ་ནི་མི་སེམས་ལ་རག་ལུས་ཡོད་པ་དང་། མི་རིགས་མཐུན་སྒྲིལ་གྱི་འབྲེལ་བ་དམ་དུ་གཏོང་རྒྱུ་དེ་ཡང་མི་སེམས་ལ་རག་ལུས་ཡོད་པ་རེད། མི་རིགས་མཐུན་སྒྲིལ་ཡར་ཐོན་གྱི་སློབ་གསོ་གཏིང་ཟབ་དང་སློབ་གསོ་རྒྱུན་རྣམ་ཅན་དུ་འགྱུར་བའི་ལམ་སྲོལ་འཐུས་ཚང་དུ་བཏང་ནས། ཀྲུང་ཧྭ་མི་རིགས་ཀྱི་ཐུན་མོང་ཚོགས་པའི་འདུ་ཤེས་སློབ་གསོ་དང་། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་དང་ཀྲུང་གོའི་ཕུགས་འདུན་དྲིལ་བསྒྲགས་སློབ་གསོ། “སྣང་ཆེན་བཞི་དང་དགའ་ཞེན་བཞི”བཅས་ཀྱི་མང་ཚོགས་ཀྱི་སློབ་གསོའི་ལག་ལེན་བྱེད་སྒོ་རྒྱ་ཁྱབ་ངང་སྤེལ་ཏེ། ལས་ཁུངས་དང་། ཁེ་ལས། སྡེ་ཁུལ། གྲོང་རྡལ། གྲོང་སྡེ། སློབ་གྲྭ།  ཆོས་ལུགས་བྱེད་སྒོ་སྤེལ་ཡུལ་སོགས་སུ་ཁྱབ་པ་བྱས་ནས། མི་ཚང་མས་མི་རིགས་མཐུན་སྒྲིལ་ཡར་ཐོན་བྱ་གཞག་ལ་ཞུགས་པར་རྒྱུས་ལོན་དང་ཐུགས་ཁུར། རྒྱབ་སྐྱོར་བཅས་བྱེད་པའི་སྤྱི་ཚོགས་ཀྱི་ཁོར་ཡུག་བཟང་པོ་ཞིག་བསྐྲུན་དགོས། མི་རིགས་མཐུན་སྒྲིལ་ཡར་ཐོན་གྱི་སྔོན་ཐོན་དཔེ་མཚོན་དང་མི་སེམས་འགུལ་བའི་བྱས་རྗེས་སྔོག་འདོན་གཏིང་ཟབ་བྱས་ནས། དཔེ་མཚོན་སྣེ་ཁྲིད་ཀྱི་ནུས་པ་འདོན་སྤེལ་ཡག་པོ་དང་། མི་རིགས་མཐུན་སྒྲིལ་ཡར་ཐོན་གྱི་སྐད་སྒྲ་ཡག་པོ་འདོན་པ། མི་རིགས་མཐུན་སྒྲིལ་ཡར་ཐོན་གྱི་གཏམ་རྒྱུད་ཡག་པོ་ཤོད་པ། མི་རིགས་མཐུན་སྒྲིལ་གྱི་དྲང་ནུས་བརྒྱུད་སྤེལ་བཅས་བྱེད་དགོས། དུས་མཚུངས་གྲོང་གསེབ་ཀྱི་དུས་རབས་གསར་པའི་ཤེས་དཔལ་ལག་ལེན་ལྟེ་གནས་དང་རིག་གནས་ཐང་ཆེན་སོགས་བེད་སྤྱོད་གང་ལེགས་བྱས་ཏེ། དྲིལ་བསྒྲགས་བྱེད་སྒོ་རྒྱ་ཁྱབ་ཏུ་སྤེལ་བ་དང་། “མི་རིགས་མཐུན་སྒྲིལ་+རིག་གནས”དང་། “མི་རིགས་མཐུན་སྒྲིལ་+ཕྱུག་འགྱུར”“མི་རིགས་མཐུན་སྒྲིལ་+འཕེལ་རྒྱས”སོགས་མི་རིགས་མཐུན་སྒྲིལ་ཡར་ཐོན་གྱི་དྲིལ་བསྒྲགས་བྱེད་སྟངས་གསར་པ་འཚོལ་ཞིབ་དང་སྐུལ་འདེད་གཏོང་དགོས།

འདས་ཟིན་པའི་ལོ་ཟླར་ཕྱིར་མིག་བལྟས་ཚེ་འགྱུར་བ་འགྲོ་བཞིན་པ་ནི་ཉིན་རེ་བཞིན་འཕེལ་རྒྱས་འགྲོ་བའི་རྣམ་པ་བཟང་པོ་དེ་ཡིན་པ་དང་། འགྱུར་བ་མེད་པ་ནི་སྤུན་ཟླའི་དབར་གྱི་མཛའ་བརྩེ་དེ་རེད། མ་འོངས་པར་རྒྱང་ལྟ་བྱས་ཚེ། ལྗོངས་ཡོངས་ཀྱི་མི་རིགས་ཁག་གི་བུ་ཕྲུག་ཚོས་བློ་གཅིག་སེམས་གཅིག་དང་ཕན་ཚུན་རོགས་རེས། རང་ཉིད་ཀྱི་མིག་ལ་གཅེས་སྤྲས་བྱེད་པ་ལྟར་མི་རིགས་མཐུན་སྒྲིལ་ལ་གཅེས་སྤྲས་བྱེད་པ་དང་། རང་ཉིད་ཀྱི་ཚེ་སྲོག་ལ་གཅེས་སྤྲས་བྱེད་པ་ལྟར་མི་རིགས་མཐུན་སྒྲིལ་ལ་གཅེས་སྤྲས་བྱས་ཏེ། སེ་འབྲུའི་འབྲུ་གུ་དང་འདྲ་བར་མཉམ་དུ་མི་རིགས་མཐུན་སྒྲིལ་གྱི་མེ་ཏོག་ནམ་ཡང་གངས་ལྗོངས་ས་མཐོར་བཞད་པར་བྱེད་པ་དང་། ཕྱར་བ་གྲུ་འདེགས་ཀྱིས་དུས་རབས་གསར་པའི་བོད་ཀྱི་མི་རིགས་མཐུན་སྒྲིལ་ཡར་ཐོན་བྱ་གཞག་གི་རྣམ་པ་གསར་པ་གཏོད་དགོས།