དོགས་ཟོན་ནི་གློག་འཕྲིན་ཁ་བསླུས་འགོག་པའི་གོམ་པ་དང་པོ་ཡིན།

 རྒྱལ་ཡོངས་དྲ་རྒྱའི་བདེ་འཇགས་དང་ཆ་འཕྲིན་ཅན་གྱི་ལས་དོན་ཚོགས་འདུའི་ཐོག་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་“ཁྲིམས་བཞིན་དྲ་རྒྱའི་ཧེག་པ་དང་གློག་འཕྲིན་དྲ་བའི་ཁ་བསླུས། སྤྱི་དམངས་སྒེར་གྱི་གསང་དོན་བཙན་གནོད་སོགས་ཀྱི་ཁྲིམས་འགལ་ཉེས་གསོག་ལ་རྡུང་རྡེག་ནན་པོ་བཏང་ཏེ་དྲ་རྒྱའི་ཉེས་གསོག་ཁེ་ཕན་གྱི་འབྲེལ་ཐག་བཅད་ནས་མི་དམངས་མང་ཚོགས་ཀྱི་ཁྲིམས་མཐུན་ཁེ་དབང་ལ་སྲུང་སྐྱོང་བྱེད་དགོས་”ཞེས་གསུངས་པ་དེ་ལས་དྲ་རྒྱའི་བདེ་འཇགས་དེ་མི་དམངས་མང་ཚོགས་ཀྱི་ཁེ་ཕན་སྲུང་སྐྱོང་བྱེད་པའི་ཁྲོད་ཀྱི་གལ་ཆེའི་རང་བཞིན་གསལ་པོར་བསྟན་ཡོད། 

 ད་ཆ་ཚན་རིག་ལག་རྩལ་ཉིན་རེ་བཞིན་འཕེལ་རྒྱས་འགྲོ་བ་དང་མི་རྣམས་ཀྱི་འཚོ་བ་ལ་ཡང་འཕེལ་རྒྱས་ཆེན་པོ་བྱུང་ཡོད། ལྷག་པར་དུ་ཁ་པར་དང་གློག་ཀླད་སོགས་གསར་དར་གློག་རྡུལ་ཐོན་རྫས་རྒྱུན་ཆད་མེད་པར་ཁྱབ་གདལ་འགྲོ་བ་དང་ཆབས་ཅིག་ཚན་རྩལ་ལ་བརྟེན་ནས་གཞན་གྱི་རྒྱུ་ནོར་ཁ་བསླུས་བྱེད་པའི་གནས་ཚུལ་ཉིན་རེ་བཞིན་ཐོན་བཞིན་ཡོད། ཉེ་བའི་ལོ་ཤས་རིང་། གློག་འཕྲིན་ཁ་བསླུས་ཀྱི་གནས་ཚུལ་རྣམ་པ་འདྲ་མིན་གྱི་ཐོག་ནས་རྒྱལ་ཡོངས་ས་ཕྱོགས་གང་སར་ཐོན་ནས་མང་ཚོགས་ཀྱི་ཁེ་ཕན་ལ་གནོད་འཚེ་ཚབས་ཆེན་ཕོག་ཡོད་པ་རེད། གློག་འཕྲིན་ཁ་བསླུས་དེ་ཐོག་མའི་བྱ་དགའི་མིང་ཐོག་ནས་ཁ་བསླུས་རྒྱག་པ་ནས་ད་ལྟ་དྲ་ཐོག་ནད་དུག་བེད་སྤྱད་ནས་ཁ་བསླུས་རྒྱག་པ་སོགས་མདོར་ན་གནོད་འཚེ་ཕོག་མཁན་ལ་ཁ་པར་དང་འཕྲིན་ཐུང་། དྲ་བ་བརྒྱུད་ཆ་འཕྲིན་རྫུས་མ་བཟོས་ཏེ་མགོ་སྐོར་དང་བསླུ་བྲིད། འཇིགས་སྐུལ་སོགས་ལ་བརྟེན་ནས་གནོད་འཚེ་ཕོག་མཁན་གྱི་རྒྱུ་དངོས་ཧམ་བཟུང་བྱེད་པའི་ཁྲིམ་འགལ་གྱི་བྱ་སྤྱོད་དེ་དག་ལོ་རེ་བཞིན་འགོག་ཐབས་མེད་པར་གྱུར་ནས་མི་དམངས་མང་ཚོགས་ཀྱི་དཔལ་འབྱོར་ཐད་གྱོང་གུན་ཆེན་པོ་བཟོ་བ་དང་རྒྱུན་ལྡན་གྱི་ལས་ཀ་དང་འཚོ་བའི་སྒྲིག་ལམ་ཚབས་ཆེན་དཀྲུག་པ་སོགས་མི་དམངས་མང་ཚོགས་ཀྱི་བདེ་རྩར་ཐུག་པའི་ཁེ་ཕན་ལ་གནོད་འཚེ་ཚབས་ཆེན་གཏོང་བའི་སྤྱི་ཚོགས་ཐུན་མོང་གི་གནད་དོན་ཞིག་ཏུ་གྱུར་ཡོད་པ་རེད།  

གློག་འཕྲིན་ཁ་བསླུས་ལ་ཁྱབ་རྒྱ་ཆེ་བའི་ཁྱད་ཆོས་ལྡན་ཡོད་པས་གནོད་འཚེ་ཕོག་མཁན་ཁྲོད་མང་ཚོགས་དཀྱུས་མ་དང་ཁེ་ལས་ཀྱི་སྦྱིན་བདག གཞུང་ཞབས་པ། སློབ་གྲྭའི་དགེ་རྒན་སོགས་ལས་རིགས་མི་འདྲ་བའི་མི་སྣ་ཚུད་ཡོད་ལ་ལས་རིགས་ཁག་ཚང་མ་གློག་འཕྲིན་ཁ་བསླུས་རྒྱག་ཡུལ་ཤིག་ཏུའང་གྱུར་ཡོད། ད་ཕན་ལོ་ཤས་རིང་སྤྱི་བདེ་ལས་ཁུངས་ཀྱིས་ནུས་ཤུགས་ཡོད་རྒུས་ཁ་བསླུས་ཉེས་གསོག་ལ་རྡུང་རྡེག་མཐའ་གཅིག་ཏུ་བཏང་ཏེ་མི་དམངས་མང་ཚོགས་ཀྱི་རྒྱུ་ནོར་དང་བདེ་འཇགས་ལ་སྲུང་སྐྱོང་བྱེད་དང་བྱེད་བཞིན་ཡོད་ན་ཡང་ལོ་ལྟར་རྒྱལ་ཡོངས་སུ་གློག་འཕྲིན་ཁ་བསླུས་གྱོད་གཞི་འབོར་ཆེན་ཐོན་ནས་མི་མི་ཉུང་བ་ཞིག་ལ་དཔལ་འབྱོར་གྱོང་གུན་ཚབས་ཆེན་བཟོས་ཡོད་པ་རེད། གློག་འཕྲིན་དྲ་བའི་ཁ་བསླུས་ཉེས་གསོག་མང་ཆེ་བ་ས་ཁུལ་ལས་བརྒལ་བ་དང་ཐ་ན་རྒྱལ་མཚམས་ལས་བརྒལ་བས་གྱོད་འབྲེལ་མ་དངུལ་དང་གནོད་འཚེ་ཕོག་མཁན་ས་ཕྱོགས་གང་སར་ཁྱབ་ཡོད་ལ་དྲ་སྦྲེལ་དང་གློག་འཕྲིན། རྩིས་འཁོར་སོགས་ཁྱབ་ཁོངས་ནང་ཉེས་གསོག་དཔང་རྟགས་འཚོལ་དཀའ་བས་གྱོད་གཞིའི་མྱུལ་ཞིབ་དང་གྱོད་གཞི་རྩད་གཅོད་དེ་བས་དཀའ་བར་གྱུར་ཡོད། དེར་རྟེན། ང་ཚོས་རྣམ་ཀུན་འཚོ་བའི་ཁྲོད་དུ་དོགས་ཟོན་བྱེད་རྒྱུ་གཙོ་བོར་འཛིན་ནས། ཆ་མེད་རྒྱུས་མེད་ཀྱི་ཁ་པར་དང་འཕྲིན་ཕྲན་སོགས་ལ་ཡིད་ཆེས་མི་བྱེད་པ། དྲ་ཚིགས་གང་བྱུང་དང་སྦྲེལ་མཐུད་མི་བྱེད་པ། དྲ་ཐོག་ཏུ་དཔལ་འབྱོར་འགྲོ་འོང་བྱེད་སྐབས་ཡིད་གཟབ་བྱེད་པ། སྒེར་གྱི་ཆ་འཕྲིན་དང་དངུལ་ཁང་བྱང་བུའི་ཨང་གྲངས། གསང་བའི་ཨང་གྲངས། ར་སྤྲོད་ཨང་ཀི་སོགས་མི་གཞན་ལ་གང་བྱུང་འཁོ་འདོན་མི་བྱེད་པ། གློག་འཕྲིན་ཁ་བསླུས་སོགས་ཁྲིམས་འགལ་གྱི་ཆ་འཕྲིན་འབྱོར་ཚེ་རང་འགུལ་ངང་སྤྱི་བདེ་ལས་ཁུངས་སམ་གློག་འཕྲིན་ལྟ་སྐུལ་དོ་དམ་ཚན་པར་ཐེར་འདོན་གོང་ཞུ་བྱས་ནས་རང་ཉིད་ཀྱི་ཁེ་ཕན་ལ་གནོད་འཚེ་མི་ཕོག་པ་བྱེད་རྒྱུ་གལ་འགངས་ཆེ།