མི་རིགས་མཐུན་སྒྲིལ་རྒྱུན་འཁྱོངས་ལྷོད་མེད་བྱ་དགོས།

ལྗོངས་ཡོངས་ཀྱི་མི་རིགས་མཐུན་སྒྲིལ་ཡར་ཐོན་གྱི་གཟེངས་བསྟོད་ཚོགས་ཆེན་ཐོག་ཧྲུའུ་ཅི་ཝུའུ་དབྱིང་ཅེས་རང་ལྗོངས་ཀྱིས་མི་རིགས་མཐུན་སྒྲིལ་ཡར་ཐོན་གྱི་ལས་དོན་ཏན་ཏིག་ངང་སྤེལ་བས་ལྗོངས་ཡོངས་སུ་མི་རིགས་ཁག་ཕན་ཚུན་འཆམ་མཐུན་དང་། ཕན་ཚུན་ལྟ་སྐྱོང་། འཆམ་མཐུན་མཉམ་གནས། ཕྱར་བ་གྲུ་འདེགས། ཞི་མཐུན་འཕེལ་རྒྱས་བཅས་ཀྱི་རྣམ་པ་བཟང་པོ་ཐོན་ཡོད་ཅེས་གསུངས་གནང་བ་རེད།

མི་རིགས་ཀྱི་གནད་དོན་ཐག་གཅོད་ལེགས་པོ་བྱེད་པ་དང་།  མི་རིགས་ཀྱི་ལས་དོན་ལེགས་པོ་བསྒྲུབ་རྒྱུ་ནི་མེས་རྒྱལ་གོང་བུ་གཅིག་གྱུར་དང་མཐའ་མཚམས་སྲ་བརྟན་གྱི་དོན་ཆེན་དང་འབྲེལ་བ་ཡོད་པ་དང་།  མི་རིགས་མཐུན་སྒྲིལ་དང་སྤྱི་ཚོགས་བརྟན་ལྷིང་གི་དོན་ཆེན་དང་འབྲེལ་བ་ཡོད་ལ། རྒྱལ་ཁབ་ཡུན་རིང་བདེ་འཁོད་དང་ཀྲུང་ཧྭ་མི་རིགས་དར་རྒྱས་གོང་འཕེལ་གྱི་དོན་ཆེན་དང་ཡང་འབྲེལ་བ་ཡོད། ང་ཚོས་ངེས་པར་དུ“སྲུང་སྐྱོང་གཉིས” ཀྱི་ཆབ་སྲིད་ཀྱི་མཐོ་ཚད་དུ་ལངས་ནས་མི་རིགས་མཐུན་སྒྲིལ་ལ་ཤུགས་སྣོན་རྒྱག་རྒྱུ་དེ་འཐབ་ཇུས་རང་བཞིན་དང་། རྨང་གཞིའི་རང་བཞིན། ཡུན་རིང་རང་བཞིན་བཅས་ཀྱི་ལས་དོན་དུ་བརྩིས་ཏེ་བསྒྲུབ་པ་དང་། རྒྱུྱན་འཁྱོངས་ལྷོད་མེད་ཀྱིས་རྨང་གཞི་འདིང་བ་དང་རྒྱང་རིང་ལ་ཕན་པའི་ལས་དོན་ཏན་ཏིག་ངང་བསྒྲུབ་ནས་སྤྱི་ཚོགས་བརྟན་ལྷིང་དང་ཡུན་རིང་བདེ་འཁོད་ཆེད་རྨང་གཞི་བརྟན་པོ་འདིང་དགོས།

ངོས་འཛིན་མཐོ་རུ་བཏང་ནས་མི་རིགས་མཐུན་སྒྲིལ་ཡར་ཐོན་གྱི་ལས་དོན་ལ་འགོ་ཁྲིད་བྱེད་ཤུགས་ཆེ་རུ་གཏོང་དགོས། ཏང་གི་འགོ་ཁྲིད་ནི་མི་རིགས་ཀྱི་ལས་དོན་ལེགས་པར་བསྒྲུབ་པའི་རྩ་བའི་འགན་ལེན་ཡིན་པ་དང་། མི་རིགས་ཁག་མཐུན་སྒྲིལ་ཆེན་པོ་ཡོང་བའི་རྩ་བའི་འགན་ལེན་ཡང་ཡིན། གནས་བབ་གསར་པའི་འོག་གི་མི་རིགས་མཐུན་སྒྲིལ་ཡར་ཐོན་གྱི་ལས་དོན་ལེགས་པར་བསྒྲུབ་པར་གནད་འགག་ནི་ཏང་གིས་ཁྱོན་ཡོངས་གཅིག་འདོམས་དང་། ཕྱོགས་ཁག་མཐུན་འགྲིག་བྱེད་པའི་འགོ་ཁྲིད་ཀྱི་སྲོག་ཤིང་ནུས་པ་འདོན་སྤེལ་བྱེད་རྒྱུ་དེ་ཡིན།

དྲིལ་བསྒྲགས་བྱེད་ཤུགས་ཆེ་རུ་བཏང་སྟེ་མི་རིགས་མཐུན་སྒྲིལ་ཡར་ཐོན་གསར་གཏོད་ཀྱི་ཁོར་ཡུག་བསྐྲུན་དགོས། མི་རིགས་མཐུན་སྒྲིལ་ཡར་ཐོན་གསར་གཏོད་ཀྱི་བྱེད་སྒོ་ནི་རང་ལྗོངས་ཀྱི་མི་རིགས་མཐུན་སྒྲིལ་ཡར་ཐོན་བྱ་གཞག་ལ་སྐུལ་འདེད་གཏོང་བའི་བྱ་ཐབས་གལ་ཆེན་ཞིག་ཡིན་པ་དང་། ལྗོངས་ཡོངས་ཀྱི་རིམ་ཁག་ཏང་སྲིད་རྩ་འཛུགས་ཀྱིས་སྣ་མང་ཕུན་སུམ་ཚོགས་པའི་བྱ་ཐབས་སྤྱད་དེ་སྤྱི་ཚོགས་ཡོངས་སུ་མི་རིགས་མཐུན་སྒྲིལ་གྱི་དྲིལ་བསྒྲགས་སློབ་གསོ་རྒྱ་ཁྱབ་ངང་གཏིང་ཟབ་ཏུ་སྤེལ་བ་དང་འབྲེལ་མི་རིགས་ཁག་གི་ལས་བྱེད་མང་ཚོགས་ལ་རང་རྟོགས་ངང་མི་རིགས་མཐུན་སྒྲིལ་ལ་སྲུང་སྐྱོང་བྱེད་རྒྱུར་ཁྲིད་སྟོན་བྱེད་དགོས།

དུས་རབས་གསར་པའི་མི་རིགས་མཐུན་སྒྲིལ་ཡར་ཐོན་ལས་དོན་ཡག་པོ་སྒྲུབ་ཆེད། ལྗོངས་ཡོངས་ཀྱི་རིམ་ཁག་ཏང་སྲིད་རྩ་འཛུགས་དང་རྒྱ་ཆེའི་ཏང་ཡོན་ལས་བྱེད་པས་ཁྱོན་ཡོངས་དང་འཐབ་ཇུས་ཀྱི་མཐོ་ཚད་ཐོག་ནས་དུས་རབས་གསར་པའི་མི་རིགས་ལས་དོན་ལེགས་པར་བསྒྲུབ་པའི་དམིགས་བསལ་གལ་ཆེན་རང་བཞིན་དང་དངོས་ཡོད་དགོས་གཏུགས་རང་བཞིན་ལ་ངོས་འཛིན་གང་ལེགས་བྱེད་པ་དང་། ལས་ཀའི་བསམ་ཕྱོགས་གསར་གཏོད་དང་། ལས་ཀའི་ཐབས་ཤེས་ལེགས་སུ་གཏོང་བ། རྙོག་འཛིང་ཆེ་བའི་གནད་དོན་ཐག་གཅོད་བྱེད་པ་དང་། འགལ་བ་དང་ཉེན་ཁ་སེལ་བ།   སྤྱིི་ཚོགས་འཆམ་མཐུན་དང་བརྟན་ལྷིང་ལ་སྲུང་སྐྱོང་བྱེད་པའི་ནུས་པ་བཅས་ལ་ཤུགས་སྣོན་ཟམ་མི་ཆད་པ་བརྒྱབ་སྟེ། བྱ་སྤྱོད་དངོས་ཀྱི་ཐོག་ནས་མི་རིགས་མཐུན་སྒྲིལ་ཡར་ཐོན་གྱི་ལས་དོན་ལ་སྐུལ་འདེད་གཏོང་དགོས།