དྲ་རྒྱའི་བདེ་འཇགས་ནི་དམངས་ཀྱི་ཆེད་དུ་ཡིན་ལ། དྲ་རྒྱ་བདེ་འཇགས་དམངས་ལ་བརྟེན་དགོས།

དྲ་རྒྱའི་བདེ་འཇགས་མེད་ན་རྒྱལ་ཁབ་ཀྱི་བདེ་འཇགས་མེད།  ཆ་འཕྲིན་གྱི་དུས་རབས་མྱུར་པོར་བསླེབས་པའི་དུས་རབས་ཉེར་གཅིག་འདིར་དྲ་རྒྱ་དེ་མི་རྣམས་ཀྱི་འཚོ་བའི་ཁྲོད་མེད་དུ་མི་རུང་བའི་གཞི་རྒྱུ་ཞིག་ཏུ་གྱུར་ཡོད། འོན་ཀྱང་དྲ་རྒྱའི་ལག་རྩལ་གྱིས་མི་རྣམས་ལ་སྟབས་བདེ་བསྐྲུན་པ་དང་དུས་མཚུངས་སུ་དྲ་རྒྱའི་ཁ་བསླུས་དང་མི་སྒེར་གྱི་གསང་བ་ཕྱིར་གྱར་སོགས་ཀྱི་ཁྲིམས་འགལ་ཉེས་གསོག་གི་དོན་རྐྱེན་མང་པོ་ཐོན་གྱི་ཡོད། དེར་བརྟེན། ཇི་ལྟར་བྱས་ཏེ་རྒྱ་ཆེའི་མི་དམངས་མང་ཚོགས་ཀྱི་དྲ་རྒྱའི་བར་མཐོངས་ཀྱི་ཐོབ་ཚོར་དང་བདེ་འཇགས་ཚོར་སེམས། བདེ་སྐྱིད་ཚོར་སེམས་བཅས་གོང་མཐོར་གཏོང་རྒྱུ་དེ་མགྱོགས་མྱུར་ཐག་གཅོད་བྱེད་དགོས་པའི་དུས་རབས་ཀྱི་ཞིབ་འཇུག་བྱ་གཞི་ཞིག་ཏུ་གྱུར་ཡོད།    

ཁྲིམས་སྐྱོང་ནི་དྲ་རྒྱའི་བདེ་འཇགས་ཀྱི་རྨང་གཞི་ཡིན་པས་ཁྲིམས་སྐྱོང་གི་འདུ་ཤེས་དང་ཁྲིམས་སྐྱོང་གི་བསམ་བློ།    ཁྲིམས་སྐྱོང་གི་བྱེད་ཐབས་བཅས་སྤྱད་དེ་དྲ་སྦྲེལ་འཕེལ་རྒྱས་དང་བཅོས་སྐྱོང་ལ་སྐུལ་འདེད་བཏང་ཚེ་གཞི་ནས་དྲ་རྒྱའི་བདེ་འཇགས་ལ་འགན་ལེན་བྱེད་ཐུབ།     

ཁྲིམས་སྐྱོང་ནན་པོ་དང་ཁྲིམས་འཛིན་དྲང་གཞག་བྱས་ཏེ་མི་དམངས་མང་ཚོགས་ཀྱི་བསམ་འཆར་ཆེ་བའི་གནད་དོན་བཅོས་སྒྲིག་བྱེད་ཤུགས་ཆེ་རུ་གཏོང་བ་དང་། “དྲ་རྒྱ་དྭངས་གསལ”དང་། “དྲ་རྒྱ་གཙང་བཤེར། ”སོགས་ཀྱི་བྱ་སྤྱོད་རྒྱུན་མཐུད་སྤེལ་ནས་དྲ་རྒྱའི་རྨང་གཞིའི་ཐོན་ཁུངས་དང་དྲ་རྒྱའི་མ་ལག་གལ་ཆེན།    དྲ་རྒྱའི་གྲངས་གཞི་སོགས་ཁྱབ་ཁོངས་ཀྱི་བདེ་འཇགས་ལས་དོན་ལ་ཤུགས་སྣོན་བརྒྱབ་སྟེ་ཁྲིམས་ལྟར་དྲ་རྒྱའི་བདེ་འཇགས་ལ་གནོད་འཚེ་གཏོང་བའི་ཁྲིམས་འགལ་ཉེས་གསོག་གི་བྱ་སྤྱོད་སྣ་ཚོགས་ལ་དོགས་ཟོན་དང་རྡུང་རྡེག་བཏང་ནས་དྭངས་ཤིང་གཙང་བའི་དྲ་རྒྱའི་སྐྱེ་ཁམས་ཤིག་བསྐྲུན་དགོས།    

དྲ་རྒྱའི་བར་མཐོངས་ཀྱི་འགྲན་རྩོད་དེ་མཐར་གཏུགས་ནས་བཤད་ན་ཤེས་ལྡན་མི་སྣའི་དབར་གྱི་འགྲན་རྩོད་ཞིག་རེད།  མི་སྣ་གཙོ་བོར་འཛིན་པ་དང་ཐོན་ལས་ལ་དམ་འཛིན་བྱས་ཚེ་གཞི་ནས་དེ་བས་ལེགས་པའི་དྲ་རྒྱའི་བདེ་འཇགས་ཀྱི་མཐོ་ས་གཏོད་ཐུབ།  ཏང་དང་རྒྱལ་ཁབ་ཀྱི་ཆེད་དུ་ཤེས་ལྡན་མི་སྣ་གསོ་སྐྱོང་བྱ་རྒྱུ་མཐའ་འཁྱོངས་བྱས་ནས། དགོས་མཁོ་དང་གནད་དོན་ལ་དམིགས་ཏེ་གསོ་སྐྱོང་ལམ་སྲོལ་ལེགས་སྒྲིག གསོ་སྐྱོང་ཐོན་ཁུངས་བསྡུ་སྒྲིལ་སོགས་བྱས་ནས་ཕྱོགས་ཡོངས་ནས་དྲ་རྒྱའི་བདེ་འཇགས་ཀྱི་ཤེས་ལྡན་མི་སྣ་གསོ་སྐྱོང་དང་ནང་འདྲེན།  བེད་སྤྱོད་ལེགས་པོ་བཅས་བྱས་ཏེ། ཏང་གི་བཀའ་ལ་ཉན་པ་དང་ཏང་གཅེས་རྒྱལ་གཅེས་ཀྱི་དྲ་རྒྱའི་བདེ་འཇགས་ཀྱི་གདོང་མཆོང་མི་སྣ་གསོ་སྐྱོང་བྱེད་དགོས།

མི་དམངས་མང་ཚོགས་ནི་དྲ་རྒྱའི་བདེ་འཇགས་སྲུང་སྐྱོང་བྱེད་པའི་འགག་རྩའི་གཙོ་གཟུགས་ཡིན་པ་དང་དྲ་རྒྱའི་བདེ་འཇགས་སྲུང་སྐྱོང་བྱ་རྒྱུ་དེ་ཡང་སྤྱི་ཚོགས་ཡོངས་ཀྱི་ཐུན་མོང་གི་འགན་འཁྲི་ཞིག་ཡིན། སྲིད་གཞུང་དང་ཁེ་ལས། སྤྱི་ཚོགས་རྩ་འཛུགས་བཅས་ཀྱི་སྟོབས་ཤུགས་སྤྱི་འདོམས་བྱས་ཏེ་བརྒྱུད་རིམ་ལྡན་པའི་སྒོ་ནས་ཇུས་འགོད་དང་དྲ་རྒྱའི་དོ་དམ་འདུ་ཤེས་གསར་གཏོད། དྲ་རྒྱའི་བདེ་འཇགས་ལག་རྩལ་ཁྱབ་གདལ།    དྲ་རྒྱའི་བདེ་འཇགས་ཀྱི་འགན་འཁྲི་སྒྲུབ་པ་བཅས་བྱས་ནས་ཧུར་ཐག་ངང་མཉམ་སྐྲུན་མཉམ་བཅོས་ཀྱི་རྣམ་པ་བཟང་པོ་ཞིག་ཆགས་པ་བྱེད་དགོས།  ཕྱོགས་གང་ཅིའི་ཐད་ཀྱི་སྟོབས་ཤུགས་སྐུལ་སློང་གང་ལེགས་བྱས་ཏེ་མི་དམངས་མང་ཚོགས་ཀྱིས་ལྟ་འདོད་ལ་ཉན་སྤྲོ་བའི་རྣམ་པའི་ཐོག་ནས་དྲ་རྒྱའི་བདེ་འཇགས་སྡེ་ཁུལ་དང་གྲོང་གསེབ། ཁེ་ལས། ལས་ཁུངས། སློབ་གྲྭ ཁྱིམ་ཚང་བཅས་སུ་སྐྱོད་པ་སོགས་ཀྱི་དྲིལ་བསྒྲགས་སློབ་གསོའི་བྱེད་སྒོ་རྒྱ་ཁྱབ་ངང་སྤེལ་ནས་དྲ་རྒྱའི་བདེ་འཇགས་ཁྲོད་མི་ཚང་མས་བཞུགས་པ་དང་མི་ཚང་མར་འགན་འཁྲི་ཡོད་པ།   མི་ཚང་མས་མཉམ་སྤྱོད་བྱེད་པ་བཅས་ཀྱི་འདུ་ཤེས་དེ་ཐུན་མོང་གི་ངོས་འཛིན་ཞིག་ཏུ་འགྱུར་བ་བྱས་ཏེ། དམངས་ཡོངས་ཀྱིས་དྲ་རྒྱའི་བདེ་འཇགས་ཀྱི་འགོག་སྲུང་འཛིང་རགས་གཏོད་པའི་མཉམ་ཤུགས་སྟོབས་ཆེན་ཞིག་ཆགས་པ་བྱེད་དགོས།     རྒྱ་ཆེའི་དྲ་དམངས་རྣམས་ཀྱིས་ཀྱང་རང་ཉིད་ཀྱི་འགོག་སྲུང་འདུ་ཤེས་དང་ནུས་པ་ཆེ་རུ་བཏང་སྟེ་དྲ་རྒྱའི་བདེ་འཇགས་ལས་དོན་ནང་ཧུར་ཐག་ཞུགས་ནས་བདེ་འཇགས་དང་བརྟན་ལྷིང་གྱི་དྲ་རྒྱའི་བར་མཐོངས་ཤིག་བསྐྲུན་ཆེད་རང་ཉིད་ཀྱི་སྟོབས་ཤུགས་ལེགས་སྐྱེས་སུ་འབུལ་དགོས།