རིག་པ་སྒྲིམ་ནས་སློབ་ཁྲིད་བྱེད། གཅེས་སེམས་བཅངས་ནས་མི་གསར་སྐྱོང་།

དོན་གྲུབ་སྒྲོལ་མ་ནི་ལྷ་ས་གྲོང་ཁྱེར་མལ་གྲོ་གུང་དཀར་རྫོང་ཉི་མ་ལྕང་རྭ་ཤང་ལྟེ་བའི་སློབ་ཆུང་གི་དགེ་རྒན་ཞིག་རེད། སློབ་ཁྲིད་ལས་ལ་གཞོལ་ནས་ལོ་32སོང་རིང་། དོན་གྲུབ་སྒྲོལ་མས་སྔ་བར་ཕྱི་གསུམ་དུ་རང་འཁྲིའི་ལས་གནས་ཐོག་གཞི་ཚུགས་པ་དང་དུས་ཡུན་རིང་པོར་ས་བབ་མཐོ་བའི་ཐག་རིང་ལུང་ཁུག་གི་གྲོང་གསེབ་སློབ་གསོ་སློབ་ཁྲིད་ཀྱི་འཐབ་ས་དང་པོར་གཞི་ཚུགས་ནས་འབད་འབུངས་ཡར་བརྩོན་བྱེད་བཞིན་མཆིས། ཁོང་གིས་སྒེར་སེམས་མེད་པའི་གཅེས་སེམས་དང་བརྩེ་སེམས་ལ་བརྟེན་ནས་ཕུགས་འདུན་དོན་གཉེར་བྱེད་མཁན་སློབ་མ་ཚང་མར་ལྕག་སྐུལ་བྱས་ཏེ་སྤྱིར་བཏང་གི་ལས་གནས་ཐོག་སྤྱིར་བཏང་མིན་པའི་གྲུབ་འབྲས་བཏོད་པར། སློབ་གྲྭའི་དགེ་སློབ་ཚོའི་བསྔགས་བརྗོད་དང་ཁྱིམ་བདག་གི་གདེང་འཇོག་བཟང་པོ་ཐོབ་པ་མ་ཟད། བྱ་སྤྱོད་དངོས་ཀྱི་ཐོག་ནས་དུས་རབས་གསར་པའི“བཞི་ལྡན”དགེ་རྒན་བཟང་པོའི་གོ་དོན་དང་རིན་ཐང་གསལ་འགྲེལ་ཡང་བྱས་པ་རེད།

དོན་གྲུབ་སྒྲོལ་མས་གྲོང་གསེབ་ཀྱི་སློབ་གསོ་བརྟན་སྲུང་བྱེད་པའི་ཧུར་སེམས་ཆེན་པོ་དང་བློ་རྩ་བརྟན་པོར་བརྟེན་ནས་ལྗིད་ཏིག་ཏིག་གི་གཟི་བརྗིད་མཚན་སྙན་མང་པོ་ཐོབ་ཡོད་ཅིང་། བོད་རང་སྐྱོང་ལྗོངས་ཀྱི་གྲོང་གསེབ་དགེ་རྒན་བྱས་ནས་ལོ་25སོང་བའི་ཚེ་གང་གྲུབ་འབྲས་བྱ་དགའ་དང་། ལྷ་ས་གྲོང་ཁྱེར་རིམ་པའི་ཕུལ་བྱུང་དགེ་རྒན། ལྷ་ས་གྲོང་ཁྱེར་གྱི་ཕུལ་བྱུང་དགེ་རྒན་གྱི་ཟངས་ཀྱི་བྱ་དགའ་སོགས་ཐོབ་པ་རེད། ཉིན་ཤས་གོང་། དོན་གྲུབ་སྒྲོལ་མར“རྒྱལ་ཡོངས་ཀྱི་དཔེ་བཟང་དགེ་རྒན”གྱི་མཚན་སྙན་ཐོབ་ཅིང་། གཟི་བརྗིད་མཚན་སྙན་ཐོབ་པ་དང་ཆབས་ཅིག གྲོང་གསེབ་ཀྱི་སློབ་གསོ་བརྟན་སྲུང་བྱེད་པའི་ཁོང་གི་གདེང་ཚོད་དང་ཆོད་སེམས་སྔར་བས་བརྟན་དུ་ཕྱིན་ཡོད། ཉི་མ་ལྕང་རྭ་ཤང་ལྟེ་བའི་སློབ་ཆུང་དུ་དགེ་རྒན་བྱས་ནས་ལོ་25སོང་རིང་དོན་གྲུབ་སྒྲོལ་མས་ཐོག་མཐའ་བར་གསུམ་དུ་འཛིན་བདག་གི་འགན་ཁུར་ནས་རང་ཉིད་ཀྱི་སེམས་ནུས་ཡོད་ཚད་སློབ་གསོ་སློབ་ཁྲིད་ཀྱི་ལས་དོན་ཐད་ལེགས་སྐྱེས་ཕུལ་བ་རེད། ཁོང་གིས་རང་གཅུན་ནན་པོ་དང་རང་དཔེ་གཞན་སྟོན་གྱིས་རང་ཉིད་ཀྱི་གཏམ་སྤྱོད་ལ་བརྟེན་ནས་སློབ་མ་དང་ཉེ་འགྲམ་གྱི་ལས་རོགས་ལ་ཤུགས་རྐྱེན་ཐེབས་པར་བྱེད་ཀྱི་ཡོད།

ད་ཆ་མལ་གྲོ་གུང་དཀར་རྫོང་གི་སློབ་གསོའི་བྱ་གཞག་ལ་གནམ་ས་བླ་འོག་ཏུ་འགྱུར་བ་ལྟ་བུའི་འགྱུར་ལྡོག་བྱུང་ཞིང་། འོས་འགན་སློབ་གསོ་སྤུས་ལེགས་དང་དོ་སྙོམས་འཕེལ་རྒྱས་ཕྱིན་པ་དང་སློབ་ཞུགས་གོང་གི་སློབ་གསོ་ཡོངས་ཁྱབ་དང་ཀུན་ཕན་བྱུང་ཡོད། འོན་ཀྱང་ལོ་20ལྷག་ཙམ་གོང་དེ་གར་སློབ་གསོའི་ཐོན་ཁུངས་དཀོན་པ་དང་སྒྲིག་བཀོད་དང་སྒྲིག་ཆས་ཐབས་ཆག་ཅིག་ལས་མེད། དོན་གྲུབ་སྒྲོལ་མ་ཉི་མ་ལྕང་རྭ་ཤང་ལྟེ་བའི་སློབ་ཆུང་དུ་ལས་བགོས་རྒྱག་སྐབས་སློབ་ཁྲིད་ཀྱི་སྒྲིག་བཀོད་ཐབས་ཆག་དང་སློབ་ཁྲིད་ཀྱི་ཐོན་ཁུངས་མི་འདང་བ་སོགས་ཀྱི་གནད་དོན་འཕྲད་ཅིང་། ཁོང་གིས་ཚད་ཡོད་ཀྱི་ཆ་རྐྱེན་ལ་བརྟེན་ནས་ཐབས་བརྒྱ་ཇུས་སྟོང་གིས་དཀའ་ངལ་ཁྱད་བསད་བྱས་ཡོད།

རང་ཉིད་ཀྱིས་སློབ་ཆས་བཟོས་པ་བརྒྱུད་ལྐོག་འགྱུར་གྱི་རྩིས་རིག་གི་གོ་དོན་དང་གསོན་ཉམས་དོད་པའི་ལོ་རྒྱུས་ཀྱི་གཏམ་རྒྱུད་རྒྱུན་གཏན་གྱི་སློབ་ཁྲིད་ནང་བཅུག་སྟེ། སློབ་ཁྲིད་གསོན་ཉམས་དོད་ལ་སྤྲོ་སྣང་ལྡན་པ་ཞིག་ཏུ་གྱུར་པ་དང་རོལ་རྩེད་ཞོར་ལ་སློབ་གསོ་ཐེབས་ནས་སློབ་མའི་སློབ་སྦྱོང་གི་སྤྲོ་སྣང་འཕེལ་བ་དང་ཧུར་སེམས་སྐུལ་སློང་གང་ལེགས་ཐུབ་ཡོད། ས་གནས་དེ་གའི་སློབ་མའི་རྨང་གཞིའི་ཤེས་བྱ་བལྟོས་བཅས་ཀྱིས་ཞན་པ་ལས་དོན་གྲུབ་སྒྲོལ་མའི་སློབ་ཁྲིད་ལ་འགྲན་སློང་ཆེན་པོ་འཕྲད་ཡོད། ཁོང་གིས་དུས་ཚོད་མང་པོ་སྤྱད་དེ་སློབ་མ་མི་རེ་ངོ་རེའི་སློབ་སྦྱོང་གི་གནས་ཚུལ་ཤེས་རྟོགས་བྱས་པ་དང་འབྲེལ། རང་གཤིས་ཅན་གྱི་སློབ་ཁྲིད་ཇུས་གཞི་བཟོས་ཏེ་ཁོང་ཚོར་རིམ་གྱིས་སློབ་སྦྱོང་བྱས་ནས་ཤེས་ལྡན་པར་འགྱུར་བའི་ཡིད་ཆེས་འཕེལ་བར་བྱས་ཡོད། འཚོ་བའི་ཁྲོད་ཁོང་གིས་ལས་ལ་བཀུར་བ་དང་སློབ་མར་གཅེས་པའི་སློབ་གསོའི་འདུ་ཤེས་ཐོག་མཐའ་བར་གསུམ་དུ་བརྟན་པོ་བསྲུངས་ནས། སློབ་མ་རང་ཉིད་ཀྱི་ཕྲུ་གུར་བརྩི་བ་དང་། སློབ་མའི་འཚོ་བར་ཐོག་མཐའ་བར་གསུམ་དུ་སེམས་ཁུར་བྱེད་པ། ཁོང་ཚོའི་སེམས་ནང་གི་སྐད་ཆ་ཉན་པ་བཅས་བྱས་པས་སློབ་མ་ཚོའི་དགེ་རྒན་ཡག་པོ་དང་གྲོགས་པོ་ཡག་པོ་ཞིག་ཏུ་གྱུར། ཁོང་གི་སེམས་ཁུར་དང་བྱམས་སྐྱོང་འོག་སློབ་མ་ཚོས་དྲོ་སྐྱིད་དང་རེ་བ་ཚོར་ནས་རི་ཁུལ་ནས་ཐོན་ཏེ་ལས་དབང་ལ་འགྱུར་ལྡོག་གཏོང་བའི་ཁོང་ཚོའི་ཆོད་སེམས་སྔར་བས་བརྟན་དུ་ཕྱིན་ཡོད།

སློབ་གྲྭའི་རྐང་འཛིན་དགེ་རྒན་ཡིན་པའི་དོན་གྲུབ་སྒྲོལ་མས་ཆེད་ལས་སྣེ་ཁྲིད་ཀྱི་ནུས་པ་གང་ལེགས་བཏོན་ཏེ། ན་གཞོན་དགེ་རྒན་གྱི་སྣེ་ཁྲིད་དེ་སློབ་ཚན་སློབ་ཁྲིད་སྒྱུར་བཅོས་ཏན་ཏིག་བྱེད་པ་དང་དགེ་རྒན་གསོ་སྦྱོང་གི་ལས་དོན་ཡག་པོ་བསྒྲུབས་ནས་དགེ་རྒན་དཔུང་ཁག་དེ་བས་ལེགས་པའི་ངང་འཚར་ལོངས་ཡོང་བར་སྐུལ་འདེད་བཏང་ཡོད།

ལོ་30ལྷག་ཙམ་རིང་དོན་གྲུབ་སྒྲོལ་མས་བརྩེ་སེམས་དངོས་དང་བྱ་སྤྱོད་དངོས་ལ་བརྟེན་ནས་སློབ་གསོའི་འདུ་ཤེས་དེ་དྲོ་སྐྱིད་ལྡན་པའི་ལག་ལེན་དུ་འགྱུར་བར་བྱས་པ་དང་དཔེ་ཁྲིད་མི་སྐྱོང་ནི་ཁོང་གི་ངོས་ནས་བརྗོད་ན་རྔམ་བརྗིད་ལྡན་ལ་བླ་ན་མེད་པའི་བྱ་བ་ཞིག་ཡིན། གཟི་བརྗིད་ཀྱི་མདུན་དུ་ཁོང་གིས“ངས་རང་ཉིད་ཀྱིས་སྒྲུབ་དགོས་པའི་བྱ་བ་བསྒྲུབས་པ་ཡིན། ཕྲུ་གུ་ཚོས་ངར་སྟོབས་ཤུགས་སྦྱིན་པ་དང་ཡུལ་འདིས་ང་རང་གསོ་སྐྱོང་བྱས་བྱུང་། འབྱུང་འགྱུར་ངས་མུ་མཐུད་གངས་ལྗོངས་ས་མཐོར་གཞི་ཚུགས་ཏེ་ཀུན་སྤྱོད་དང་། ཤེས་རིག ལུས་རྩལ། མཛེས་དཔྱོད། ངལ་རྩོལ་བཅས་ཕྱོགས་ཡོངས་ནས་འཕེལ་རྒྱས་འགྲོ་བའི་སྤྱི་ཚོགས་རིང་ལུགས་ཀྱི་འཛུགས་སྐྲུན་པ་དང་རྒྱུན་འཛིན་པ་དེ་བས་མང་བ་གསོ་སྐྱོང་བྱ་ཆེད་རང་ཉིད་ཀྱི་སྟོབས་ཤུགས་སྐྱེས་སུ་ཕུལ་ནས་སློབ་གསོའི་འོད་ཟེར་ཕྲུ་གུ་ཚོའི་ཕུགས་འདུན་ལམ་བུར་འཕྲོ་བར་བྱེད་ཀྱི་ཡིན”ཞེས་ཁེངས་སྐྱུང་ངང་བརྗོད།

རྩོམ་སྒྲིག་པ། ཡེ་ཤེས་ཚེ་བརྟན།