མཛེས་སྡུག་ལྡན་པའི་ཁྱིམ་གཞིས་བསྐྲུན་དགོས།

སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས། “བོད་ཞི་བས་བཅིངས་འགྲོལ་བཏང་ནས་ལོ་ངོ་70སོང་རིང་། ཏང་ཀྲུང་དབྱང་གི་འགྱུར་མེད་སྟོབས་ལྡན་གྱི་འགོ་ཁྲིད་དང་རྒྱལ་ཡོངས་མི་དམངས་ཀྱི་རྒྱབ་སྐྱོར་ཤུགས་ཆེན་འོག བོད་ཀྱི་མི་རིགས་ཁག་གི་ལས་བྱེད་པ་དང་མང་ཚོགས་ཀྱིས་དཀའ་སྤྱད་འབད་འཐབ་དང་སྙིང་རུས་བརྟན་འཁྱོངས་བྱས་པས། སྤྱི་ཚོགས་ཀྱི་ལམ་ལུགས་ལ་ལོ་རྒྱུས་རང་བཞིན་གྱི་མཆོང་སྐྱོད་བྱུང་ཞིང་། དཔལ་འབྱོར་དང་སྤྱི་ཚོགས་ཕྱོགས་ཡོངས་ནས་འཕེལ་རྒྱས་བྱུང་བ་མ་ཟད། མི་དམངས་ཀྱི་འཚོ་བར་འགྱུར་ལྡོག་ཆེན་པོ་ཕྱིན་ནས། གྲོང་ཁྱེར་དང་གྲོང་གསེབ་ཀྱི་རྣམ་པར་སྔོན་ཆད་དང་བསྡུར་ཐབས་བྲལ་བའི་འགྱུར་ལྡོག་བྱུང་ཡོད”ཅེས་ནན་བཤད་གནང་ཡོད།

བོད་ནི་རང་རྒྱལ་གྱི་སྐྱེ་ཁམས་བདེ་འཇགས་སྲུང་བཅད་གལ་ཆེན་ཞིག་ཡིན་པ་དང་། འདི་གར་ང་ཚོས་ཧི་མ་ལ་ཡའི་རི་རྒྱུད་ཀྱི་གངས་རིས་འཐེན་པའི་ཡངས་ཤིང་རྒྱ་ཆེ་ལ་རྔམ་བརྗིད་ལྡན་པའི་ས་གཞི་ཆེན་པོའི་ཐིག་རིས་མཐོང་ཐུབ་ལ། འདི་གར་ང་ཚོས་ཡར་ཀླུང་གཙང་པོ་དྲག་ཏུ་བཞུར་ནས་མི་དང་རང་བྱུང་ཁམས་ཞི་མཐུན་མཉམ་གནས་ཀྱི་རྣམ་པ་མཐོང་ཐུབ་ཅིང་། འདི་གར་ང་ཚོས་གཙོད་དང་རྐྱང་མུ་མཐའ་མེད་པའི་ཐང་སྟོང་དུ་བརྒྱུགས་ནས་སྐྱེ་དངོས་སྣ་མང་རང་བཞིན་གྱི་ངོ་མཚར་ཡང་མཐོང་ཐུབ…… འདི་གའི་རྩྭ་དང་རྩི་ཤིང་རེ་རེ་དང་རི་ཆུ་ཁྲི་སྟོང་དུ་མ་སྲུང་སྐྱོང་བྱེད་པ་ནི་ང་ཚོའི་འགན་འཁྲི་རེད།

བསྐྱར་དར་རྟགས་ཅན་གྱི་མེ་འཁོར་གངས་ལྗོངས་ས་མཐོར་ཤར་གཏོང་ཐུབ་ནས་བོད་ཀྱི་འཕེལ་རྒྱས་མགྱོགས་སུ་ཕྱིན་ཡོད།“བོད་སྐྱོད་པ་རྒན་གྲས་ཀྱི་སྙིང་སྟོབས”དང“ལམ་གཉིས་ཀྱི་སྙིང་སྟོབས”ཀྱིས་མི་རིགས་ཁག་གི་ལས་བྱེད་པ་དང་མང་ཚོགས་ལ་དཔའ་ངར་ཆེན་པོས་བྱས་རྗེས་འཇོག་པ་དང་འབད་འབུངས་ཆེན་པོས་མདུན་དུ་སྐྱོད་པར་ལྕག་སྐུལ་བྱེད་བཞིན་ཡོད། འགྲིམ་འགྲུལ་གྱི་དྲ་རྒྱ་འཐུས་སྒོ་ཚང་དུ་ཟམ་མི་ཆད་པར་ཕྱིན་པ་དང་བསྟུན་ནས། རྨང་གཞིའི་སྒྲིག་བཀོད་ཀྱི་འཛུགས་སྐྲུན་ལ་ཤུགས་སྣོན་རྒྱུན་ཆད་མེད་པར་ཐེབས་པ་སོགས་ཀྱིས་ས་མཐོའི་འཕེལ་རྒྱས་ལ་གསོན་ཤུགས་ཟམ་མི་ཆད་པ་བྱིན་ཡོད། ཐོན་ལས་ཉིན་བཞིན་འཕེལ་རྒྱས་ཕྱིན་པ་དང་འཚོ་བ་དེ་བས་འཁྲུག་ཏུ་སོང་ནས་མི་རིགས་ཁག་གི་ལས་བྱེད་པ་དང་མང་ཚོགས་ཀྱིས་མཉམ་དུ་འཕེལ་རྒྱས་གཏོང་བའི་ནང་སྐྱེས་སྒུལ་ཤུགས་འཕེལ་ཏེ། བདེ་སྐྱིད་ལྡན་པའི་འཚོ་བ་དོན་གཉེར་གྱི་རེ་འདོད་སྔར་བས་ཆེ་རུ་ཕྱིན་ཡོད།

བོད་ལ་མཆོང་སྐྱོད་ལྟ་བུའི་འཕེལ་རྒྱས་བྱུང་ནས་མི་རིགས་ཁག་གི་ལས་བྱེད་པ་དང་མང་ཚོགས་སྐལ་བཟང་མེ་ཏོག་ལྟར་གངས་ལྗོངས་ཀྱི་མཐའ་མཚམས་སུ་གཞི་ཚུགས་ནས་མཉམ་དུ་མཛེས་སྡུག་ལྡན་པའི་ཁྱིམ་གཞིས་སྐྲུན་པ་དང་བདེ་སྐྱིད་ལྡན་པའི་འཚོ་བར་རོལ་ནས་སྤུས་ཚད་མཐོ་བའི་འཕེལ་རྒྱས་ཀྱི་ལེའུ་གསར་པ་ཞིག་རྩོམ་བཞིན་ཡོད།

རྩོམ་སྒྲིག སྤེན་པ་བདེ་སྐྱིད།